شنطة مدرسة

موضوع: شنطة مدرسة السبت فبراير 21, 2009 4:15 am

شنطة مدرسه

متغرقه دم

وكراسه

وورقه وقلم

كانوا بيكتبوا الحلم

وصوت قنابل

وصوت مدافع

وفرقعه

و بم

ولغبطه ودربكه

ونحيب وبكا

وصرخة أم

شنطة مدرسه

متغرقه دم

وطفل مرمى ع الجدار

وفوضى و دمار

وضرب نار

وحزن وغم

وصراخ اطفال مرعوبين

وصوت آدان

لكن حزين

حى على الكفاح

بتقول لمين

اسكت ياعم

شنطة مدرسه

متغرقه دم

وعيله تاهت من بعضها

وعيله ماتت كلها

وعيله راح منها

خال وعم

وطفل مش لاقى ابوه

وام ضناها خدوه

سجنوه او قتلوه

ولا اتعدم ؟

شنطة مدرسه

متغرقه دم

و ناس بتشجب من بعيد

وناس عماله تعيد وتزيد

ويقولوا سلام

واهو كله كلام

كدب ووهم

واجتماعات ومؤتمرات

ومساومات

وحوارات

و حرقة دم

شنطة مدرسه

متغرقه دم

وورقه وقلم

كانوا بيكتبوا الحلم

[center]